O EI segue apostando por unha fronte ampla para iniciar un proceso de refundación e rexeneración do BNG, que permita convertelo no suxeito da acción política ao servizo do pobo galego, nunha organización útil e democrática que permita convertelo no referente político que represente á inmensa maioría da sociedade galega que o precisa con urxencia.

Por tanto é necesario construír unha grande alianza, unha ampla fronte plural de consenso interno, do que só ficaría excluído quen así o queira, de organizacións e afiliados e afiliadas individuais do BNG que, coma nós, partillen as ideas de renovación, refundación e rexeneración do BNG.

Só unha candidatura aberta a todas as persoas que estamos a prol disto, especialmente grupos e persoas independentes que asumen medidas como as propostas polo EI nas súas teses ten garantía de éxito.

Facemos un chamado a concertar as bases para esa fórmula que estamos seguros será exitosa na Asemblea Nacional, porque aínda hai tempo para iso se as vontades expresadas se materializan.

O Encontro seguirá a traballar para conseguir o máximo de unidade arredor destes obxectivos, co máximo de xenerosidade e supeditando calquera interese particular ao interese xeral do BNG e de Galiza.

Queremos facer público tamén o noso compromiso de que, se os avatares deste proceso levasen a que non houbese unha única lista que propugne a refundación do BNG, daremos o noso apoio á lista mais votada na segunda volta para garantir ao máximo as posibilidades e evitar que a UPG e o seu candidato teñan unha maioría que lles permita seguir nesta liña actual que leva o BNG á súa extinción.