Despois de percorrer as rúas de Monforte por "un cambio global" este sábado, 15 de outubro, quedáronnos unha serie de impresións sobre o que está acontecer.

Esta é a visión dende o interior galego, agardamos polos vosos comentarios sobre outras mobilizacións do 15 de outubro neste Punto de Encontro do Encontro Irmandiño.

1. Hai vida, e iso é positivo. A "xente está revolta", hai ganas de construír un mundo diferente, así que o xerme das mobilizacións de 2011 vai ser, apáguese ou non o movemento en sí, positivo.
2. Por aquí o movemento ten percorrido, e moito: vaise celebrar un interesantísimo foro social os días 26 e 27 de novembro, onde se han tratar problemáticas globais e comarcais.
3. Non hai infantilismo político, senón imaxinación, ilusión e, quizais, inxenuidade, no bo sentido, pois é necesaria unha dose de inxenuidade e optimismo para enfrontarse ao Poder, con maiúsculas.
4. Sábese cal é o inimigo e sábese do perigo de reforzar ao PP, pero o mal chamado "voto útil" rematou. A xente é moi consciente do campo embarrado no que se xoga, sobre todo no que toca á manipulación informativa.
5. As propostas son de cambio do sistema, non reformistas, como se soe acusar a este movemento. Hai certas propostas reformistas a curto prazo (dende logo, tamén o BNG leva propostas neste senso no seu programa electoral, porque sabemos que neste momento son necesarias, aínda que aspiramos a trocar o sistema). O fondo que se propón é un cambio de civilización, sendo moi conscientes de que o equilibrio ecolóxico igual nos impón este cambio, pero polas bravas.
6. Non atopamos belixerancia contra o dereito de autodeterminación dos pobos. Se acaso, o que nos topamos é que o novo-vello mundo fai que esa reivindicación sexa inútil se non se abrazan outras coa mesma forza, como, por exemplo, as que propuxo o Encontro como programa de "creba democrática". Iso entronca coa tradición cívica do nacionalismo galego.
7. Deberíamos facer caso da advertencia que nos facía Xosé Manuel Beiras na serie de artigos "A doutrina dos dous mundos... no actual nacionalismo galego": non vaiamos tecer a nosa propia rede nacionalista, homoxeneizada e, teoricamente, coherente, pero illada e engulida cando o fascismo campe ás súas anchas, e todo porque non fósemos capaces de tender pontes coa xente que está a "espertar do seu sono".

Manifestación 15 Outubro. Santiago de Compostela. from Mon on Vimeo.